و دي حلقه اخري من حلقات المترو و عربه السيدات
لما رجعت من الامارات كنت لما بمشي في الشارع كنت بحس اني عارفه كل حد في الشارع و حاسه ان كل ست ماشيه هي خالتي او عمتي و كل وش بشوفه بحس انه مألوف ليا جدا بس شويه شويه و بدأت اخف من الحاله دي بس من ساعه ما بدأت اركب عربه السيدات و انا رجعتلي الحاله دي و ا النهارده كنت راكبه المترو و كان في واحده ست معاها شنطه جلد متينه من بتوع زمان و مكتوب عليها المقاولون العرب حسيت بحاجه غريبه اوي و انا ببص علي الشنطه دي حسيت اني رجعت شقه جدتي رحمه الله عليها و انا طفله و بدعبس في الشنط القديمه بتاعتها عشان اساعدها ننزل الشتوي و نرجع الصيفي و استرجعت ذكرياتي الحلوه في شقه الذكريات و اشتقت الي جدتي و جدي و دعواتهم لي و تلك المسحه الحنينه علي راسي من يد جدي رحمه الله و رقيته لي بجد و رأيت هذه الحظات تمر كشريط سينما امامي و شعرت بقشعريره تمر في جسدي و احسست بدموعي تحاول الانفلات من بين جفوني و لكني تماسكت نفسي و تداركت وجودي بين الناس و فجأه اكتشف ان محطتي جت و لازم انزل بسرعه بس و قعدت اقول لنفسي شنطه لا اعرفها و لا شوفتها قبل كده تعمل فيا كل ده دي حاجه غريبه و الله مش حاجه تجنن بذمتكم في حد اجن مني ليونكن ابدا

by fwitema

المكان: عربه السيدات بالمترو

الصراحه مفيش اجن من المواصلات العامه و خصوصا المترو و عربه السيدات ساعه الذروه

اصل هو ده طريق عودتي من الكليه كل يوم و بما اني بلاحظ و اشم الجنان من علي بعد

ف في طريقي ده مكنتش محتاجه مجهود كبير عشان اشوف الجنان لكن لازم تشوفوا رحلتي من الاول خالص من ساعه ما بنزل الصبح من بيتنا عشان تعرفوا هو ليه جنان

يعني مثلا الصبح و انا رايحه الكليه تلاقي الناس صامته صمت رهيب و كل واحد يا اما نايم يا اما بيقفرا حاجه

قراءن انجيل او جريده او حتي ورق مذاكره لكن ايلي يجنن بجد انك تلاقي بنتين في الجامعه او حتي في الثانويه العامه قاعدين مهييسسين علي الاخر و صوتهم عالي بغض النظر عن الصمت الرهيب ايلي يحوط المكان

او حتي ام معاها اولادها رايحه توصلهم المدرسه و العيال بيفطروا و يشربوا العصير و هي عماله تقولهم خدوا بالكم لتوعقوا علي هدومكم و بمنديل كل شويه تمسح لهم بقهم مكان العصيرو تزعق لهم و هي بتعدلهم هدومهم

و تشوف وجوهه شقيانه و تعبانه و صورهم تتحفر في دماغك و كأنك تعرفهم من مليون سنه

يعني انا شوفت ستات كتير اوي تحس انك عايز تديهم جايزه و تكرمهم علي مجهودهم في الحياه هتقولي و انتي عرفتي منين هقولك بكل خط تجعيد في وشها بيقول انها حفرت في الصخر كتير عشان الزمن يقول انها تستحق خط التجعيد ده علي وشها و علي وشها بالذات عشان يبقي وسام و دليل علي كفاحها هي مالها قلبت غم كده ليه ما علينا

و كل ما أتاخر عن النزول في معادي اشوف العجب و كل ما الدنيا بتزدحم كل ما العجب يزيد بس يمكن الصبح بيكون مفيش مشكله اوي عشان معظم الركاب هما الطالبات و ايلي بتشوف فيهم ةالعجب في واحده تلاقيها عامله زي ما تكون رايحه فرح مع ان الساعه مجتش 8 الصبح و واحده تانيه تحس انها بتجري جوا نفسها عشان خايفه تتأخر عن معاد المحاضره و هكذا بتقابل كل النوعيات و الطبقات بالرغم من انك مش اتعاملت معاهم فمابالك لو اتعاملت بقي هتشوف العجب

بتفرج علي ناس من كل طبقات المجتمع

لكن ايلي ليه العجب حال الناس ساعه الذروه ناس بتزق و تزعق و يكن كمان تضرب لا مش انا ايلي اضرب طبعا انا قصدي امهات بتضرب عيالها و مش طايقين نفسهم و ايلي يجننك اني واقفه اتفرج و كأني بطل عليهم من عالم تاني و مش عايشه معاهم المأساه دي بس سبحان الله انا عمري ما حسيت بعناء المواصلات دي ابدا خصوصا ان بحس اني ببص علي صندوق الدنيا و انا راكبه المترو

و ايلي يجننك اكتر و اكتر واحده ست من الناس الهاي اوي قاعده في المترو جنب واحده ست غلبانه و هدومهه مطربه و ايلي ما تعرف يضحكك و لا يبكيك ان الاتنين قاعدين قرفانين من بعض

الست الهاي طبعا قرفانه من الست الغلبانه و الست الغلبانه بتبصلها و تحس انك بتقرأ الكلام في عنيها و في وشها بوضوح و كأنها بتقولها مالك يا اختي قرفانه كده ليه محدش جبرك تركبي المترو و لا تلاقي عربيتك عطلانه

وكمان جايين تشاركونا في وسيله المواصلات بتاعت الغلابه يلا بقي

و تلاقي اتنين ستات ميعرفوش بعض و قعدوا جنب بعض يشكوا همهم لبعض و العيال و الطبيخ و نظام التعليم و الواد مش عاجبه المصروف و البت عايزه هدوم و هكذا تسمع حكايات لها العجب بجد يعني لو بسجل كل حاجه بسمعا من اول يوم كنت عملت كتاب حكايات ميقلش عن 3000 صفحه و لا حاجه

بس هحاول انقل لكم ايلي سمعته علي قد مقدر و ده كله عشان مش كلكم بتركبوا المترو و بتشوفوا ايلي انا بشوفه

فهنقل لكم عالم غريب اوي اوي مختلف عن اي وسيله مواصلات اخري

و المشكله ان العالم ده بتكتسب منه حاجات و يخليك تعمل حاجات مكنتش تتخيل انك تعملها

يعني مثلا في يوم ركبت المترو و قعدت جنب بنت و لاقيتها عماله تعيط و تعيط جامد اوي فصعبت عليا بجد

في الاول كنت متردده اتكلم معاها او حتي اديها مناديل و بعدين حسيت ان ربنا باعتني ليها معرفش ليه

دا حتي جت واحد قعدت ما بينا و دا صعب الموضوع شويه بس انا لقيت نفسي بقولها ممكن ابدل مع حضرتك المكان و بدلت مكاني و رجعت قعدت جنب البنت و طلعتلها و منديل و قعدت اتكلم معاها و اقولها مفيش حاجه في الدنيا تستاهل و كده و شويه و بدأت اطبطب عليه و قعدت تشكيلي همها و انا اصبرها و في الاخر طلعت نازله نفس محطتي نزلنا مع بعض و اخدت رقمها و اخيرا انتهي اللقاء بعناق و قبله حاره

انا عمري ما كنت اتخيل اني ممكن اعمل كده في يوم من الايام بس اهو ايلي حصل متعرفش جنان و لا ايه

و سيتوالي عرضي للجنان ايلي مالي عليا حياتي و مخليها ليها طعم و الله اصل الجنان ده متعه و تحس انك تخرج من مغامره و تخش في واحده تانيه احلي

by fwitema

راكب راسى

طول عمرى راكب راسى

ولا حد له عندى كلام

اقول الكلمة ماتتردش

ولا ييجى وراها كلام

ما انا واد تقيل وراسى

وما حبش كتر كلام

كنت بفرد نفسى على الشلة

واقول ان انا الكبير

ولا حد ماسكلى ذلة

ولا يقدر يرغى كتير

لحد ما كنت فى يوم ماشى

بليل والدنيا سكون

فارد نفسى ومتعنطز

ولا تقول نابليون

سمعت صوت الدورية

قلت يا واد ما يهمش

ده الظابط يوم ما يشوفك

هيقولك اهلا مشمش

وماشى انا كده بثات

لقيت الظابط آت

وسألنى بكل بساطة بطاقتك فين يا عينيا

وجاوبت انا بألاطة نسيتها فى النملية

قاللى يا عينى عليك كان بدرى عليك يا صغنن

تعالى معايا فى فسحة لطيفة واوعى تخاف .. اطمن

قلت يا بيه وتتعب ليه

وما سمعتش رد على قفايا حط ايديه

ومش فاكر بعدها حصل ايه

لكن من يومها وانا ايدى ما تفارقش قفايا

وباصص على طول فى الارض

by TATA

دي بقي خاطره هنعرضها تحت اسم توأم التصقا في الرأس و لكل جسد وهتعرفوا ليه

فى يوم فكرت وقلت يا واد ما تحبش ليه

هو الحب كتير عليك و لا ايه

بس هحب مين و ليه

هحب ايلي حبني و لا ايلي حطيت عيني عليه

طيب يا واد لو حبيت ايلي حبك انت هتحبه علشان ايه

علشان حبه ليك و لا عشان انت قررت تحب ايلي تلاقيه

و لو حبيت ايلي حطيت عينك عليه هتعمل ايه

حتفضل تحب علي نفسك كده و لا ايه

و رجعت قلت لنفسي حب ايه و هباب ايه

هو انت مش عارف انت وراك ايه

هو الحب ده بالساهل كده و لا ايه

ده الحب ده بدايه مشوار طويل اوي مقدرش عليه

مصاريف و شبكه و مهر و معرفش ايه و ايه

راح قلبي قالي بس الحب ده ايههههههههههههههه

قلت له ما انا عارف بس انت متقدرش عليه

راح عقلي قالي ايوه خليك كده عارف انت امكانياتك ايه

و كفايه عليك تتفرج عليه في افلام زمان بتاعت البطل اسمه ايه

و لما تبقي قده ابقي تعالي اتكلم عليه

قلت له حاضر و انا مضايق منه بس ايه

اخدت معاد من قلبي انا و هو نتكلم عليه

نتكلم عن الحب و ما الهوي غلاب و هنعمل اي

by fwitema

( دي كتبتها انا لوحدي بعد ما طاطا كتبت اول سطر و النت فصل و لما النت رجع لقيت طاطا كتبت واحده

و كان اول سطر فيها هو العامل المشترك ما بين الاتنين عشان كده توأم التصقا في الرأس و مش هطول عليكم و اسيبكم مع الابداع)

فى يوم فكرت وقلت يا واد ما تحبش ليه

هو الحب كبير عليك يا واد ولا ايه

طب ده انت مجدع وقيمة وسيمة يا ابن الايه

ومين دى يا واد اللى تقول لا وهترفض ليه

طب جرب كده وشاور على واحدة وشوف هتقولك ايه

ومافيش لحظة والتانية الا ولقيتها جاية

بنت ما شاء الله عليها

قمر سبحان من صور عينيها

لقيت نفسى تنحت وبرقت ولا حشت عينى من عليها

ولا قدرت اخطى خطوة ناحيتها ولاقدرت اقاوم عينيها

ولقيتنى طبيت وشكلى كده حبيت

وروحت البيت على ابويا وقلت يا ريت

يا ريت يا ابويا تسمح لى وتتكرم وتخطبلى

بنت قمر 14سبحان من صور

وسألت عليها وعالأصل دور

وعرفت انها بت مجدع مافيش منها اتنين

اتكرم بقى واسمح واشتريلنا دبلتين

ومن يومها عرفت ان فى الحب ما فيش كبير

ولا واد جربوع ولا ابن وزير

ما دام حبيت وحصل وطبيت

by TATA

هي دي اول خاطره كتبناها انا و بطتي مشتركه و كانت اول جنونه و توالت الاحداث الجنونيه بعدها

عمرك فكرت بجنان فوق العاده

فكرت تعمل كل حاجه مش معتاده

تنط السور وتتعفرت بزيادة

ايوه انا فكرت اعمل اعاده

اشوف الدنيا زي ما انا عايزه اشوفها

من غير سكر زيادة

اشوفها بحقيقتها من غير زيادة

اشوف كل الدنيا بروحى انا بفكرى مش بفكر وكلام السيادة

ويحصل ايه لو اتجننت بزيادة

ما دام جنانى ده ممكن يوصلنى للافادة

ممكن اشوف حياتى بشكل تانى مجنون يمكن بس يوصلنى للريادة

ممكن اكون مجنون بس اعتقد كلامي مفهوم

وحتى لو ما اتفهمش هيبان فى الاعادة

ما هو اصل انا مجنون اه

لكن جنانى ده اصبح عادة

وهعيد وازيد فى كلامى ده

لحد ما اوصل معاكم ان الجنان يكون سعاده

اصل جناني ده مصدر سعاده

مش سعادة لانى مش فاهم وعايش فى جنانى لكن لان جنانى فهمنى حاجات كتير

أقول تانى ولا بزيادة ؟!

by TATA and fwitema together